E- Mrejesho Kutatua Changamoto za Wananchi

Posted on: February 14th, 2026

Katibu Tawala Msaidizi wa Utawala na Rasilimali Watu kutoka Ofisi ya Mkuu wa Mkoa wa Geita Bw. Herman Matemu, amesema kuwa mafunzo ya mfumo wa e-Mrejesho yaliyotolewa kwa waratibu wa Mfumo huo ndani ya Mkoa wa Geita  yatawasaidia wananchi kufikisha kwa urahisi  malalamiko na changamoto wanazokumbana nazo pindi wanapokuwa wanapokea  huduma kutoka katika Taasisi za Serikali.

Akifunga mafunzo hayo ya  mfumo wa Mrejesho kwa waratibu wa Mfumo huo kutoka katika Ofisi za Wakuu wa Wilaya, Hospitali za Wilaya, Mkoa na Kanda pamoja na  Halmashauri za Wilaya na  Manispaa   hivi karibuni,  Ndugu Herman Matemu kwa niaba ya Katibu Tawala wa Mkoa wa Geita amesema kuwa kupitia mafunzo hayo, wananchi na watumishi  watapata uelewa wa namna ya kutumia mfumo huo wa kidijitali kuwasilisha maoni, maulizo  malalamiko na mapendekezo yao kwa wakati, hatua ambayo itaweza kuisaidia   kuboresha utoaji wa huduma na kuongeza uwajibikaji kwa watumishi  katika taasisi anazizisimamia.

Ndg. Herman Matemu  ametoa wito kwa Waratibu wote waliopatiwa mafunzo  hayo  kuhakikisha kuwa  changamoto zote  zitakazowasilishwa  kutoka kwa Wananchi zinajibiwa kwa wakati na kwa  haraka. Sambamba na hilo amewasisitiza Waratibu wa Mfumo huo pamoja na watumishi wa Umma  katika Mkoa wa Geita kutumia lugha ya staha na  heshima katika utoaji wa huduma kwa Wananchi

Afisa Rasilimali Watu kutoka Ofisi ya Rais - Menejimenti ya Utumishi wa Umma na Utawala Bora, Bibi Nasra Kasimu Idury, amesema kuwa lengo la mafunzo hayo ni kuimarisha utekelezaji wa maelekezo ya Mheshimiwa  Dkt. Samia Suluhu Hassan, Rais wa Jamhuri ya Muungano wa Tanzania ambayo yanalenga kuhakikisha taasisi za umma zinapokea, zinashughulikia na kutatua malalamiko ya wananchi kwa ufanisi na kwa wakati.  

Bi. Nasra Kasimu ameongeza kuwa  mafunzo hayo pia yanakusudia kuimarisha utekelezaji wa mwongozo wa mrejesho wa wananchi kuhusu huduma zinazotolewa na Serikali, ili kuongeza uwajibikaji na kuboresha utoaji wa huduma kwa umma.

E-mrejesho ni mfumo wa kielektroniki wa kutuma, kupokea na kufuatilia malalmiko, mapendekezo, maulizo na pongezi kuhusu huduma zinazotolewa na Serikali