Wananchi Watakiwa Kutumia Fursa Ya Kampeni Ya Kisheria

Posted on: January 28th, 2025

Mkuu wa Mkoa wa Geita Mheshimiwa Martine Shigela amewahamasisha wananchi wa Mkoa huo kujitokeza kwa wingi kutumia fursa ya kampeni ya kitaifa ya msaada wa kisheria ya Mama Samia( Mama Samia Legal Aid Campaign) ili waweze kusaidiwa katika utatuzi wa masuala mbalimbali ya kisheria wanayokumbana nayo.

Mhe. Shigela ametoa hahama hiyo hivi karibuni alipokuwa akizungumza kwa niaba ya Naibu Waziri Mkuu na Waziri wa Nishati wakati wa uzinduzi rasmi wa Kampeni ya Mama Samia Legal Aid Campaign katika viwanja vya CCM Kalangalala Geita Manispaa.

Mhe. Shigela ameongeza kuwa wananchi wa Mkoa wa Geita wanatoa shukrani za dhati kwa Rais wa Jamhuri ya Muungano wa Tanzania kwa kuwaletea huduma ya msaada wa kisheria bila gharama tofauti na kawaida ambapo ili upate huduma au msaada wa kisheria kutoka kwa wataalam hususan mawakili lazima ulipie.

“Dhamira kuu ya kampeni hii ni kutoa elimu ya sheria, kutoa msaada wa kisheria kwa waliokata tamaa, kutatua migogoro ya muda mrefu na kupanua wigo wa haki kwa wananchi wasiomudu gharama. Kuna migogoro ya ardhi, migogoro katika sekta ya madini, ndoa, mirathi inawasumbua sana wananchi ambao wameshindwa kwa kuiwasilisha kutokana na gharama zinazoainishwa hivyo wananchi tusiache kutumia fursa hii adimu itakayotuvusha kutoka kwenye migogoro hiyo.” Aliongeza Mhe. Shigela.

Kwa upande wake Mwakilishi wa Katibu Mkuu wa Wizara ya Katiba na Sheria Ndg. Alfred Dede amewaeleza wananchi kuwa baada ya uzinduzi wa kampeni huduma itaendelea kutolewa kwenye Halmashauri zote za Mkoa wa Geita kwa muda wa siku 9 na kuongeza kuwa tangu kuanza kwa kampeni hiyo jumla ya wananchi 779,191 wamenufaika na kupatiwa msaada wa kisheria ambapo kati yao wanawake ni 389,000 na wanaume ni 396,000